Verandi sameindalíffræðingur og langt numinn í fræðum læknavísindanna þá liggur áhugi minn ekki einungis í sviði bjórvísindanna heldur einnig í heilsugeiranum.  Það er því ekki skrítið að nIcebrew reyni að sameina þessi áhugasvið í formi bjórs.  Með Three Headed Monster Ale er einmitt kominn fyrsti "heilsubjór" brugghússins ef svo má að orði komast.  Verandi næstum læknir þá má ég ekki mæla með áfengisdrykkju en verandi bruggari og dálítið léttklikkaður þá má ég vel mæla með Three Headed Monster Ale.  Bjór þessi inniheldur nefnilega lækningajurtina Stjörnuanis eða Illicium verum eins og hún heitir á flottu máli.  Planta þessi hefur lengi vel verið þekkt fyrir að búa yfir lækningarmætti og má t.d. nefna ágæti hennar gegn magakveisum og meltingarvanamálum.  Plantan virðist enn fremur vera góð gegn viðrekstri sem er sérstaklega hentugur eiginleiki í bjór.  Oft virðist bjór valda viðrekstri þegar á líður en með Three Headed Monster Ale þarf ekkert að óttast á því sviði.  Þvagræsing er reyndar einnig þekktur eiginleiki Stjörnuaniss þannig að í samblandi við alkóhólið í bjórnum má líta á Three Headed Monster Ale sem ágætis möguleika fyrir vaxtaræktarfólk sem vil skera niður og tapa vökva rétt fyrir keppnir og annað.  Já já svo er hósti, liðagigt, astmi og tannpína líka eitthvað sem Sjtörnuanis vinnur á og loks má nefna að plantan er bakteríudrepandi líkt og penicillin og jafnvel veiruhemjandi ef marka má lyfjarisann Roche sem notar olíur úr plöntunni í framleiðslu Tamiflu sem er lyf gegn Influensu. Ég sé fyrir mér möguleika gegn bakteríuhálsbólgu á borð við Streptococca hálsbólgu þar sem bæði alkóhólið í bjórnum sem og plantan góða trufla vöxt baktería.  Já þetta verður mikill drykkur og merkilegur.  Hafa verður í huga að hér er enn allt á tilraunastigi og því ekki hægt að fullyrða neitt um virkni bjórsins fyrr en hann er tilbúinn og enn fremur verður það að koma fram að neysla áfengis er heilsuspillandi nema hófs sé gætt þannig er það líka með öll önnur lyf.