Þessi er sko aldeilis fallega "klæddur" ef svo má orða það í stórri flösku lokaðri með korktappa og vírneti.  Miðinn er svo afar glæsilegur og sýnir kanadíska skógarhöggsmenn sem seldu Djöflinum sál sína í skiptum fyrir flugferð heim fyrir jólahátíðarnar.  Maudite þýðir hinir fordæmdu og er einnig tilvísun í þessa gömlu sögu.  Hér er á ferð mikið hungang og smá rósaylmur í bland við appelsínu í nefi í upphafi en þegar líður á bjórinn og hann volgnar má greina þurrkaða ávexti.  Í munni er hann sterkur, maltaður án þess að vera sætur og vínlegur án þess að vera of alkóhólríkur.  Smá rúgbrauð/þurrkaðir ávextir og svo kannski appelsínubörkur eða jafnvel grape í bakgrunni?  Ögn þurr og þægilegur á tungu með léttri beiskju.  Vínandinn er ekki fyrirferðamikill en kemur þó fram sem ögn sæta.  Humlar fjarverandi!  Gott eftirbragð sem gæti kallað fram epli í huganum?  SNILLD!