Westvleteren er afar sérstakt brugghús, annars vegar vegna þess að þetta er eitt af Trappist brugghúsunum 6 og er því munkaklaustur en ekki hefðbundið brugghús og hins vegar er mjög erfitt að fá þennan bjór.  Árlega framleiða munkarnir aðeins nokkur bretti af bjór sínum sem menn verða að berjast um.  Allur bjór Westvleteren kemur í afar látlausum umbúðum sem bera enga merkimiða.  Aðeins tappinn aðgreinir þær 3 tegundir sem klaustrið hefur uppá að bjóða.  Westvleteren 12 er stekasti bjórinn þeirra með 10.2% alkóhól.  Þetta er rauðbrúnn bjór með mikla sæta rúgbrauðslykt í bland við þurrkaða ávexti og jafnvel hnetur.  Mikill í munni, öflugur og mjúkur með góða fyllingu.  M.a. má greina hnetur, þurrkaða sæta ávexti af suðrænum toga og svo sætt malt og sætan vínlegan keim.  Svakalegur bjór, þvílík gæði. Segja má að verðið (sem er dálítið hátt) endurspegli gæðin.