Tuborg ákvað nýverið að koma til móts við öra þróun í öl málum í Danmörku og skapaði tvo nýja bjóra sem eiga að brúa bilið frá hinum venjulega lager yfir í sérölið sem sætir mikilla vinsælda í landinu um þessar mundir.  Þetta er gott framtak en fyrir mína parta þá er hér um sorglega stutta brú að ræða.  Blái Tuborg er öllu meiri bjór en sá hvíti en þó mjög nálægt því að vera bara venjulegur Tuborg.  Hann er þó ögn dökkur með humlum og ögn karamellu tón en svo þetta einkennandi ullarbragð sem oft loðir við Tuborg.  Sá hvíti er mjög mildur og léttur og maður tekur vart eftir honum.  Með blómakeim í nefi og í munni og afar einfaldur á tungu.  Hentar hvað best sem sumarbjór á heitum sumardegi.  Já ég er lítt hrifinn og hef litla trú á að þessir karlar nái tilsettum sölutölum.  Frekar kýs ég Tuborg Classic t.d.