Þennan þekkja allir, Tuborg jóla!  Hingað til hef ég verið lítið spenntur fyrir honum, fannst þó ágætt að fá mér ískaldan á krana þegar ég var búsettur í Danmörku.  Þetta er klassískur jólalager og þægilegur bara. Það sem er hins vegar nýtt núna er að bjórinn ku vera bruggaður alveg frá grunni hér á Íslandi í fyrsta sinn þetta árið (2011).  Danirnir sjálfir völdu þennan bjór meira að segja framyfir sinn danska.  Já ég smakkaði hann aftur og viti menn, ég var bara nokkuð sáttur.  Miðað við sinn flokk, lager þá er þetta nokkuð góður bjór.  Koparlitaður, með humla og ögn ristað malt í nefi.  Í munni er fín fylling, brakandi humlar sem láta ögn vita af sér og svo einhver ljúf sæta sem heldur áfram inn í eftirbragðið.  Afar þægilegur og hreinn bjór.  Gæti alveg vel tekið aftur í þennan....áfram Ísland.