Þetta furðulega fyrirbæri verður að teljast einn af þeim merkilegri sem ég hef smakkað þegar þetta er ritað.  Bjór þessi sem aðeins er bruggaður í takmörkuðu upplagi ár hvert er sér í lagi vel til þess fallinn að geyma og tala menn um upp í allt að 25 ár í þeim efnum.  Í glasi er þetta stórmerkilegur karl, hnausþykkur og minnir helst á apríkósuþykkni, mattur og gjörsamlega laus við froðuna og gos. Í nefi má merkja afskaplega kjarnmikla lykt sem minnir á amaretto eða PÚRTVÍN (sætur vínlegur appelsínukeimur).  Þetta er flatur bjór en er þó ekki truflandi.  Einhver biturleiki læðist fram og rífur í tungu og blæs lífi í sopann.  Þetta er geysilega þróttmikill bjór með vínlegan karakter og minnir á einhvern líkjör eða, eins og í nefi, púrtvín.  Töluvert þurr á tungu en afar mjúkur og fyllir ágætlega.  Ögn grapefílingur til staðar og svo humlar og malt í bakgrunni.  Alkóhólið læðist svo að manni í lokin en er ekki til ama.