Hér er á ferð einhver ofur jólabjór ef marka má nafnið.  Þetta er belgískur kall hvað annað og kemur í afar fallegum umbúðum og lokaður með korktappa eins og eðal öli sæmir.  Í munni er þetta afar léttur bjór og gæti komið vel sem þambari, mildur og vottar ekki fyrir þessum 9%.  Að mínu mati er þetta ekki hentugur huggubjór á kvöldu síðkvöldi því slíkur bjór þarf að vera matarmeiri og bragðsterkari.  Í raun á ég bágt með að greina bragð því það er ekki mikið af því en það vottar fyrir humlum og ögn frútti og berjum.  Smá malt, ekki brenndur og þægilega gosríkur.  Það er svo ekkert sem maður tengir sérstaklega við jólin.  Í heild sinni er þetta hinn ágætasti bjór en er samt ekkert neinn OFUR bjór, hentar vel á jammið kannski í kringum áramótin.