Ég rak augun í þennan í dag í BILKA.  Þetta virðist vera nýr bjór frá nýlegu brugghúsi hér í Danmörku, Skovlyst Brugghús.  Þeir eru með amk 3 í hillunum, Hafrastát, Birkebryg (pilsner) og þennan India Pale Ale.  Þegar betur er að gáð þá hefur einmitt þessi IPA unnið til verðlauna hér í landi, besti IPA ársins (líklega 2008).  Bjórinn er bruggaður úr heilum 5 tegundum af humlum.   Mjög spennandi.  Í stuttu máli stenst þessi IPA fyllilega væntingar mínar og gott betur.  Það sem mér fannst einkenna bjórinn var gríðarleg mýkt og fylling.  Bjórinn liggur eins og rjómi í gómi.  Í nefi er þessi beiski humlaði keimur ásamt sítrus og blómum.  Í munni er greinilega um IPA að ræða, ölkeimur, beiskir humlar en einnig ristað þétt malt í miklu jafnvægi. Blóm og hnetur koma einnig við sögu. Fylling er með eindæmum góð og svo kemur ljúft langt eftirbragð þrungið humlum.  Já með betri IPA.