Pilsner Urquell eða hinn upprunalegi pilsner á íslensku er eins og nafnið segir fyrsti pilsner veraldar.  Já þessi gullni pilsner kom fyrst fram á sjónarsviðið árið 1842 í Pilsen í Bæheimi og varð þá fyrsti ljósi lager sögunnar. Orðið pilsner festist svo við bjórinn og hefur loðað við allan ljósan lager æ síðan.    Þetta er nettur góður bjór, ljúfur og mildur og alls ekki rammur en hefur þó ljúffenga snarpa humla sem kitla tunguna.  Skilar léttu og fínu eftirbragði.  Þennan bjór er hægt að fá í ÁTVR á furðulega góðu verði og mæli ég með því að menn prófi þennan upprunalega pilsner. Pilsner Urquell hentar vel með mat og er einnig ljúfur sem nettur listauki.

ATH: Fyrirmynd hins ljósa lagers í heiminum í dag!