Ég var mjög spenntur yfir þessum enda brugghúsið rómað fyrir gæði sín.  Í glasi er um svartan fellgan bjór að ræða með þykka fína froðu. Í nefi er hann sætur, með mikinn keim af anis og mandarínum ásamt kandís. Í munni gríðarlega mikill í munni með heilmikið bragð. Vel kolsýrður, ger,þurrkaðir ávextir, anis, appelsínur, ristað malt og brenndur sykur sem kemur inn með fyllingu og ljúfan mótleik við humla sem nánast finnast ekki. Ögn remma líklega af appelsínuberkinum og kannski anisnum kemur inn á móti maltinu og vegur það alveg rétt mátulega upp. Þessi fína upplifunin endar svo með óvenju þægilegu löngu og ljúfu eftirbragði með karamellu, brenndum sykri og ristuðu malti. Já það er í raun þetta dásamlega eftirbragð sem heillar mig mest við þennan frábæra bjór en það er líka magnað hve margar bragðtegundir maður upplifir í þessum karli.