Lýsingin hljómar vel, þurrhumlaður yfirgerjaður bjór með dásamlegum amarillo og cascade humlum sem eru ómissandi humlar í amerískum IPA sem er í sérlegu uppáhaldi.  Bjór þessi er þó ekki IPA, til þess þarf hann að vera beiskari. Fallegur er hann í glasi, koparlitaður en froðan er frekar slök.  Hverfur á augabragði.  Það er þó í lagi því restin af bjórnum er frábær.  Í nefi eru dásamlegir humlarnir áberandi með einhverja blómlega sætu með.  Í skolti er um afar þægilegan bjór að ræða, enginn ölkeimur sem pirrar marga, malt og humlar í fíngerðu jafnvægi þar sem humlar hafa þó yfirhöndina og skapa afar þægilega beiskju sem vel er merkjanleg.  Maltið gefur samt þægilega sætu og fyllingu.  Virkilega ljúfur bjór og eftirbragðið afar gott og varandi.  Besti páskabjórinn þetta árið.