Nú er komin ansi góð reynsla hjá mér á bjór frá Nørrebro Bryghus.  Þeir eru vægast sagt einstakir flestir.  Þessi er einn þeirra.  Hér er um að ræða heilmikið verkefni fyrir öll skilningarvit.  Í röngum höndum er hætt við að illa fari. Þá á ég við að menn sem lítt eru vanir eðalbjór gætu átt það til að fussa eða enn verra hella bjórnum niður.  Það væri hræðilegt.  Þessi bjór er nefnilega verðugt verkefni.  Í nefi eru humlar og nóg af þeim og jafnvel má finna smá amarillo en líka ögn sætan maltkeim.  Í munni er þetta gríðarlega bragðmikill bjór, ræðst beint á bragðlauka með öllu afli.  Minnir óneitanlega á IPA enda hér um Tripel IPA að ræða.  Mikil beiskja og biturleiki, hellingur af ýmsum humlum.  Töluvert þurr á tungu með eyrnamerg eins og vera ber og svo er hann mjúkur mjög. Það er svo líka einhver sætur keimur sem gæti verið mandarínur en einnig sé ég fyrir mér karamellu.  Já gríðarlega skemmtilegur bjór og alls ekki eins bitur og ég bjóst við.  Undir lok flöskunnar má finna dálítið fyrir vínandanum.