Hér er kominn karl sem vert er að skoða nánar.  Þó ekki nema aðeins fyrir þær sakir að þetta er einn af örfáum bjórum úr stout fjölskyldunni sem ég kann vel að meta.  Önnur ástæða er svo að skaparar bjórsins eru þeir Nørrebro menn sem sjaldan klikka.  La Granja er gott dæmi um vel lukkaðan sætan stout að enskri fyrirmynd, reyndar tilheyrir hann meira flokki bragðbættra stouta því í hann er notað kaffi "extrakt" úr mexikönsku gæðakaffi.  Í glasi er hann svartur sem nóttin og með guðdómlega froðu með kaffilatte blæ.  Þetta er kraftmikill bjór sem býður upp á mikla mýkt og svo flókið margslungið bragð sem kemur manni til að hugsa um nýmalað kaffi, sætan lakkrís og dökkt brennt súkkulaði. Þetta er bara gríðarlega skemmtilegur stout og fær mín fullu meðmæli.  Get ekki beðið eftir að prófa þennan með grillsteikinni eða frönsku súkkulaðikökunni.