Mikkeller er orðið eitt af mínum uppáhalds dönsku mikrobugghúsum.  Hér eru þeir með glænýjan IPA sem þeir kalla Green Gold.  Bjórinn ber nafn með réttu því hér er sannkallaður fjársjóður á ferð. Áður hef ég smakkað annan IPA frá þeim köppum, Stateside Indian Pale Ale og sá var sko ekkert slor. Þessi er í nefi snarpur og beiskur með humal og sítruskeim sem minnir helst á Campari eða eyrnamerg. Í munni er hann sprækur og hoppandi með mikla mýkt og alúð.  Beiskir humlarnir lífga vel uppá bjórinn og sítrus/grape kemurinn setur sterkan svip á bragðið en einnig má finna snefil af sætum maltkeim, líklega karamella eða álíka. Þrusu fylling og dásamlegt efirbragð.  Já Mikkeller gerðu það aftur, með þessum nýja IPA sannar þetta litla magnaða danska brugghús að þeir eru meistarar á sínu sviði.  Þessi bjór á vel heima með flestum mat eða bara sem hyggebjór eins og Danir segja, á síðkvöldi við arineldinn. Snilld.