Hér er bjór númer tvö í snilldar seríu frá Mikkeller.  Hér er um að ræða IPA bjóra sem eru bruggaðir úr einni tegund humals.  Á þennan hátt er hægt að bera saman mismunandi bjór og þar af leiðandi átta sig betur á hvað humlarnir eru að gera fyrir bjórinn.  Í þennan bjór hér er notaður Warrior humall sem er klassískur humall í amerískan heimabruggaðan IPA og er frekar nýr af nálinni.  Þetta er gruggugur og mattur bjór með fína þétta froðu.  Í nefi eru blóm, áberandi humlar og jörð.  Í munni er mikil og hressandi fylling.  Fullt af beiskju, blóm og hressandi humlarnir og smjör.  Já mikill bjór með skemmtilega þægilega beiskan keim og geisilega gott eftirbragð.  Hentar vel sem matarbjór og kjörinn með indverskum mat.  Ath prófið líka Simcoe Single Hop IPA frá Mikkeller.  Hann er mjög skemmtilegur.