Mikkeller er og verður alltaf mjög spennandi og óútreiknanlegt brugghús.  Hér er komin nýr bjór frá þeim sem þeir nefna The American Dream.  Þeir kalla þetta pilsner en ég verð þó að segja að bjórinn á fátt líkt með pilsner, hann þó bruggaður með lagergeri og kaldgerjaður.  Hvað um það bjórinn er góður, meira að segja mjög góður, eiginlega með betri lagerbjórum sem ég hef komist í.  Já og ameríska yfirbragðið skín bersýnilega í gegn. Þetta er gylltur bjór með léttu gruggi og fína froðu. Í nefi er mikið að gerast, humlar og fullt af þeim, einhver notalegur sætur keimur líka sem minnir talsvert á ástaraldinn í bland við grape.  Í bragði má einnig finna þennan ástaraldinn tón ásamt beiskum sýrðum keim sem stafar líklega af amerísku humlunum sem mikið er af.  Bjórinn gefur góða fyllingur og hefur heilmikið gos.  Já stórskemmtilegur bjór sem minnir dálítið á amerískan IPA en þó ekki.