Faro er blanda af gömlum og ferskum Lambic og svo er bætt út í kandís í seinni gerjun.  Útkoman er afar glæsilegur og sérstaklega ferskur bjór.  Þetta er bjór sem maður getur auðveldlega þambað.  Fallegur í glasi, tær með fallegum gasbólum líkt og freyðivín.  Sætur en dálítið súr keimur í nefi.  Í munni er hann ögn þurr á tungu en þó sætur með þægilegum keim.  Í eftirbragði má svo finna sætuna frá kandísnum.  Nammi namm.  Þessi bjór er alveg tilvalinn sem fordrykkur á meðan beðið er eftir aðalréttnum.  Flottur í háu freyðivínsglasi.  Dömurnar kunna vel við þennan.  Þess má þó geta að það er nokkuð erfitt að nálgast þennan bjórstíl í dag þar sem hann er í útrýmingarhættu eins og flestur lambic bjór.  Það er von mín að svona perla hverfi ekki alveg af sjónarsviðinu, slíkt væri hræðilegt.