Hér erum við að tala um frábæra bjórperlu frá Belgíu.  Í grunninn er notaður svo kallaður Goudenband brún-öl sem í sjálfu sér er sjálfstæður bjórstíll, Oud Bruin.   Frambozen þýðir hindber en hindberjum er einmitt bætt út í gerjunina til að kalla fram einstakan og frískandi bjór.  Glæsilegur í glasi og með fína froðu.  Í nefi er brenndur sykur og fullt af hindberjum.  Í munni er hann afar léttur og hressandi með kitlandi gos og ögn súr og þurr.  Bjórinn er því alls ekki væmin eins og ætla mætti. Eftirbragð er pínu súrt en þægilegt.  Það skemmtilega við þennan bjór er svo umbúðirnar en hverri flösku er pakkað inn í merktan kreppappír sem gefur bjórnum ansi skemmtilegt og dularfullt yfirbragð.  Menn verða að prófa þennan.