Ég kannast vel við La Trappe bjórinn, þennan eina hollenska Trappist bjór.  Ég verð þó að viðurkenna að ég vissi ekki að þeir gerðu hveitibjór einnig.  Um er að ræða hveitibjór í anda hinna belgísku hveitibjóra á borð við Hoegaarden.  Hann er mattur og ljós, nánast hvítur í glasi með mikla fína froðu.  Í munni er þetta alveg ljómandi hveitibjór, kóriander snefill, appelsínubörkur og mildir humlar.  Létt fylling og gríðarlega svalandi.  Já hér er kominn fínn staðgengill Hoegaarden á Íslandi en hann fæst ekki hér lengur eins og flestum er kunnugt.  Hvernig er svo best að drekka þennan bjór?  Jú ískaldan með góðum sallatrétt, sushi eða bara einan og sér.  Passar einnig vel með mildum ostum.  Ég hvet fólk til að prófa þennan.