Gleðilegan bjór!
bjórbókin 23.11.04

Nú styttist í jólin víðast hvar á jarðkringlunni með öllu tilheyrandi.  Það þýðir að öll helstu brugghús veraldar keppast við að koma jólabjórnum/vetrarbjórnum sínum til byggða.  Hillur verslananna fyllast því af þessum hátíðarveigum og auðvelt er að tapa áttum.  Hverja á maður að kaupa af þessum jólaköllum, hvaða bjór er bestur og hver er verstur?  Til að auðvelda mönnum valið eitthvað þá hef ég tekið saman umfjöllun um nokkra af þessum bjórum sem koma á markað í danmörku (amk í Árósum) og menn geta notað það svona til viðmiðunnar við innkaup sín.  Því miður fæst lítið af þessum bjór heima á Íslandi en þar er samt hægt að kaupa einn eða tvo.  Vona að þetta gagnist einhverjum...gleðilegan bjór!

 

Aass Juleøl er bjór frá fændum okkar Norðmönnum og þetta er jafnframt minn fyrsti norski bjór.  Aass brygghúsið hefur bruggað bjór síðan 1834 og jólabjór þeirra hefur endurtekið verið tiltaður besti norski jólabjórinn. Í nefi má finna sætt rúgbrauð og heslihnetur og í munni er hann mildur og ljúfur með mildum humlum og sæta ristaða malttóna. Pínu kryddaður með dálítinn bock fíling. Þægilegur, sætur malteftirkeimur.
3.5 krúsir
 



Avery Old Jubilation Ale. Þetta er fyrsti ameríski vetrarbjórinn minn og eftirvæntingarnar voru miklar.  Var ekki alveg sáttur við þennan bjór.  Þetta er dökkur bjór með metta froðu sem endist ágætlega.  Í nefi einhver maltkeimur, dálítið reyktur og hnetur.  Lofar svo sem góðu en í bragði er ekki neitt sérstakt að gerast, minnir meira á hefðbundinn porter bara með talsverðum brenndum karakter sem líkast til má tileinka ristuðu maltinu
2.5 krúsir
 

Bergquell Porter + Punsch. Framleiðendur segja að þetta sé bjór sem bæði er hægt að drekka ískaldann eða sjóðandi heitann svona eins og glögg.  Bjórinn er samt ekkert vondur, og það eru bara þó nokkur jól í honum.  Í nefi má finna heilmikið af kirsuberjum og kanil.  Í munni er nokkur mýkt, og mikil sæta þar sem saman tvinnast kirsuber, kanill og sætt malt.  Útkoman er svo í raun heldur væminn drykkur sem ekki hentar mínum laukum að minsta kosti.
3 krúsir
 

Bons Vaeux de La Brasserie Dupont - hér er á ferð rosalegur laukatryllir sem hefur allt sem til þarf fyrir góð jól.  Að vísu er erfitt að hafa uppá þessum bjór en ef það tekst þá eru menn að njóta bjórs með miklu flóknu bragði sem minnir pínu á Duvel.  Þetta er sterkur bjór og menn verða að vera komnir heim eftir jólagjafakaupin áður en tappinn er poppaður af þessum.  5 krúsir og ekkert múður!
 


Brøckhouse Premium Julebryg 2009 - Hér er á ferð léttur og mildur jólabjór frá þessu rómaða danska brugghúsi.  Um er að ræða mjög fábrotinn bjór sem nánast er skömm að kalla jólabjór.  Léttir humlar, lítil fylling, ögn súkkulaði með góðu móti , ristaður eða brenndur maltkeimur og í raun ekkert sem minnir á jól eða vetur.  Gæti samt trúað að hann sé góður með villibráð.
2.5 krúsir
 


Carslberg Christmas Ale - er mikið öl, þétt og fyrirferðamikið á tungu og óskaplega mjúkt og minnir á silkidúk sem breiðist yfir bragðlaukana.  Lakkrís má finna í bragði auk þess sem léttir humlar og ögn sætt malt setja svip sinn á heildarmyndina.  Þetta er ljúffengur danskur jólabjór sem óhætt er að mæla með.   4 krúsir
 


Chouffe N'ice - er belgískur jólabjór fyrir þá sem vilja fá eitthvað fyrir sinn snúð.  Í flöskunni má finna 10% vínanda sem setur sinn svip á heildar bragð bjórsins.  Fyrir mitt leiti er vínandinn aðeins og áberandi í þessum kalli en auk hans má finna öfluga humla sem gerir bjórinn bitran og ferskan.  Stór kall fyrir stóra kalla. - 3.5 krúsir.
 


Delirium Christmas - Það er orðið allt of langt síðan maður smakkaði þennan.  Þetta er vel berjað og mikið belgískt öl, gosríkt fullskrokka kvikindi með stuttu en ljúfu eftirbragði sem minnir ögn á kaffi.  Malt og frútt (sveskjur og kirsuber)  í fínu jafnvægi þannig að bjórinn er ekki væminn.  Þetta er fínn jólagaur sem óhætt er að mæla með. 3.5 krúsir.
 


Erdinger Schneweisse - er jólabjórinn frá Erdinger.  Bjórinn er í anda hinna þýsku hveitibjóra og hefur í raun ekkert jólalegt upp á að bjóða nema kannski örlitla aukningu í alkóhóli miðað við hina Erdinger kallana.  Þetta er annars fínn bjór en enginn jólabjór. 3 krúsir
 


Enghien Noél - Hér er á ferð góður tripel með smá jólaívafi.  Bjórinn lítur vel út í glasi með hnausþykkan langvarandi froðutopp.  Á tungu er hann ögn þurr en hressandi með spriklandi gosi og með því.  Svipar töluvert til Westmalle Tripel sem kemur ekki á óvart þar sem hér er jú um ósvikinn tripel að ræða.  Þetta er góður biti sem ég get gefið heilar 4.5 krúsir án þess að sjá eftir því.
 


Flying Dog K9 Cruiser Wintare Ale - Hér er dæmi um gríðarlega vel lukkaðan amerískan vetrarbjór.  Já og frá einu magnaðasta örbrugghúsi Bandaríkjanna Flying Dog.  Þessi hefur hita, fyllingur, kraftinn og stemninguna. Úr glasi stíga karamella, malt og þurrkaðir ávextir.  Þéttur bjór með mikla fyllingu. Það er létt beiskja í honum og vel tónað malt með þægilegum karamellu eftirkeim 4 krúsir.
 


GB Jingle Ale - Bjórinn er bruggaður með enskt sterköl sem fyrirmynd. Samkvæmt miðanum á flöskunni er þetta öl kryddað með hunangi, múskati og kanil. Þetta passar allt saman því um er að ræða vel kryddaðan bjór með kanil, negul og öðru spennandi.  Skemmtilegur jólabjór með gríðarlegum jólablæ.  3.5 krúsir
 


Gouden Carolus Christmas - er belgískt jólaöl í sterkari kantinum hvað alkóhól varðar (10.5%) en í munni er þetta frekar létt öl en þó mjög bragðmikið , kryddað og með áberandi lakkrískeim.    Alkóhólið kemur ekki svo áberandi fram í bragði en annað má segja um líkama og sál.  Vilji maður ilja sér með sterkum góðum jólabjór þá er það þessi.  4 krúsir
 


Greenland Julebryg - Þetta litla nýja brugghús á Grænlandi bruggar afar sérstakan bjór fyrir þær sakir að vatnið í hann er unnið úr Grænlandsísnum sem er jú yfir 2000 ára gamall.  Bjórinn er sætur í nefi með einhvern ávöxt, sennilega eitthvað sem minnir á banana en einnig vottar fyrir negul sem er jú voða jólalegt ekki satt? Þetta er léttur og skemmtilegur jólabjór en þó ekkert svakalega spes. 3.5 krúsir
 


 
Grolsch Herfst Bok - hér er sko jólabjór sem kemur svakalega á óvart.  Hver hefði trúað því að Grolsch gæti bruggað góðan jólabjór? Þetta er bara með betri bjórum sem ég hef smakkað verð ég að segja.  Hann ilmar frekar látlaust með léttum humlum en á tungu verður allt vitlaust.  Bragðið er öflugt og kitlandi gosið eykur ánægjuna.  Þetta er mjög sætur bjór en þó með afar stingandi humlum og ögn alkóhóli í restina.  Eignlega mætti segja að hér séu sætir humlar á ferð (sem er í raun afar skrítið) með smá karamellu? Ég verð að gefa þessum jólabok heilar 4.5 krúsir
 


Jefferson Julle Bryg - Hér er dálítið undarlegur bjór á ferð.  Bjórinn kemur frá Jefferson brewery sem er undir stjórn Ørbæk bryghus sem gerir oftast ágætis bjór.  Þessi bjór hér er hins vegar pínu undarlegur og minnir mig helst á skrítna blöndu hveitibjórs, belgísks blonds og kriek (kirsuberjabjór).  Kann ekki alveg við þessa samansetningu.  Annars er um mildan bjór að ræða með snefil af negul sem gefur smá jólakeim.
3 krúsir
 


Kongens Bryghus Julemumme - Kongens Bryghus er ljómandi brugghús í Kaupmannahöfn.  Þeir gera mjög skemmtilega bjóra og jólabjórinn þeirra er engin undantekning.  Julemumme sker sig dálítið út úr jólabjóraflórunni og er dálítið einstakur.  Fullt af jólakryddi og jólagleði.  Mjög skemmtilegur jólabjór í léttari kantinum sem ætti að ganga vel í flesta forvitna bjóráhugamenn sem ekki bara eru að leita að þungaviktarbjór .4 krúsir
 


La Binchoise Speciale Noel - Hér er á ferð sannur jólatryllir af belgísku bergi brotinn, hneturbrúnn í glasi með þykka fallega froðu sem varir lengi. Svakalegur í nefi með miklum sætum ávaxtarkeim og blómum og sömu sögu má segja um munn.  Mikill karakter og fullt af gómsætum jólagjöfum fyrir bragðlaukana. Þægelaga "yfirvegaður" með ljúfu malti og ögn humalkeim og biturleika sem þó er stillt í hóf. 5 krúsir
 


La Choulette De Noél - er franskur bjór af sérstökum bjórstíl sem kallast biére de garde.  Þessi bjór er einkennandi fyrir sinn stíl, jurtaður og léttur en því miður eru ekki mikil jól í honum. Fínn bjór sem ég mæli samt ekki með sem jólabjór þar sem mun betri kallar eru til í þeim geiranum.  3 krúsir
 


Mikkeller Santas Little Helper 2007 - Hið frábæra litla danska örbrugghús kemur hér með jólin í flösku.  Þessi stórskemmtilegi bjór hefur allt til að gera góðan dag enn betri eða ljúft kvöld enn huggulegra, ja eða rauð jól hvít!  Bragðmikill og stór bjór með mikinn karakter og töluverða sætu en langt frá því að vera væminn. Mjög sérstakur og sker sig úr. 4.5 krúsir
 


Nils Oscar Julöl 2007 - Þessi karl kemur frá litlu sænsku örbrugghúsi Nils Oscar.Þetta er svartur bjór með þunna eða enga froðu og í raun pínu óaðlaðandi í glasi. Nefið lokkar heldur ekki því þar má finna þungan reyktan keim.Á bragðið er hann líka mjög spes en þó töluvert jólalegur með reyktum keim og brenndum hnetum, kannski kastaníuhnetur og svo brennt malt. 
 3.5 krúsir
 


Nøgne Ø Underlig Jul -Ummm hér getur maður óhætt talað um jólabjór já sko sannarlega því  upp úr dimm dimm rauðum bjórnum stígur heil skrúðganga af jólatónum í formi neguls og kanils og þurkaðra ávaxta. Já þrælfínn jólabjór frá spennandi litlu örbrugghúsi í Noregi sem m.a. gerir einn besta Stout veraldar skv Ratebeer. 4.5 krúsir
 


Nørrebros Julebryg -Nørrebro Bryghus er líklega það brugghús sem hefur komið mér hvað mest á óvart í gegnum tíðina.  Sérstaklega fyrir þær sakir að hingað til hefur danskt öl ekkert sérstaklega höfðað til mín.  Jólabjór þeirra er með betri bjórum sem ég hef smakkað og án efa besti jólabjór Danmerkur og mæli ég eindregið með því að menn leggji sér leið í Salling eða álíka og kaupi prófi sjálfir.
4.5 krúsir
 


'Batemans Roesy Nosey - er fallega rósrauður eins og jólabjór sæmir með netta froðu sem þó hverfur snöggt. Mildur í nefi með sætum ávaxtakeim jafnvel rúsínur? Á tungu er Rosey Nosey mildur en bragðmikill, ögn hnetaður (nutty) og með brakandi humlum sem þó halda sig á mottunni en gefa þægilega beiskju. Sætt malt kemur inn í góðu jafnvægi við humla.  Mjög góð fylling og afskaplega gott og þægilegt eftirbragð. 4 krúsir
 


Pére Noel - Ég rakst á þennan karl sem mér finnst ekkert voðalega aðlaðandi en viti menn innihaldið kom svona líka skemmtilega á óvart. Þetta er mattur ljósbrúnn bjór með ögn sætan mandarínukeim í nefi ummm. Gríðarlega gómsætur í munni og matmikill.  Sætur og jafnframt beiskur með ögn sítrus og þó alls ekki súr, svo má finna brenndan sykur eða kandís og ljúffengt malt.  Í heildina afar heilsteyptur bjór með allt sem til þarf fyrir góð jól. 4.5 krúsir
 


Skovlyst Jule Bryg - Frábær jólabjór fyrir þá sem vilja jól en ekkert óviðráðanlegt monster.  Hér er um þægilegan, bragmikinn en þó mildan jólabjór að ræða með meðalbeiskju og hæfilegan skammt af jólakryddum.  Sætur, mjúkur og fullur.  Hentar vel með ýmsum mat eins og kjötréttum hverskonar.  Ég sé fyrir mér Krónhjört og Skovlyst Jule Bryg.  4 krúsir
 


St Feuillien Cuvée de Noel - Ég veit í raun ekki hvar ég á að byrja...þetta er einfaldlega sá allra besti sem er á markaðnum í dag.  Braðgmikill, alkóhólríkur, fullur í munn og ferskur.  Ögn frúttaður og með áberandi sveskjum og þurrkuðum ávöxtum.  Frábær bjór sem fæst á frábæru verði í Kvikly, Føtex, Superbest, Bilka og víðar.  Vilji maður svo fá það allra besta þá er það af krana á t.d. RisRas.  5 krúsir
 


Super Noél - er enn einn frá Belgíu.  Nafnið gefur til kynna að um einhvern ofur bjór sé að ræða en ég held að það sé aðeins of ýkt.  Þetta er fínn bjór og skilar miklu alkóhóli án þess að það komi allt of mikið fyrir í bragði.  Vantar aðeins uppá bragð og fyllingu samt.  Ágætt öl samt.  3.5 krúsir
 


't Smisje Kerst - Er bara hinn fínasti bjór sem dálítið liggur sætu megin í lífinu en verður samt aldrei væminn.  Þetta er 11% bjór sem tekur í en er þó langt frá því að vera of harður við bragðlauka.  Maður finnur lítið fyrir áfengi í bragði.  Malt, toffee, karamella, kaffi og púðursykur er nokkuð sem kemur í huga minn þegar ég renni þessum niður. Ég gef þessu fína öli 4 krúsir.
 


Val-Dieu Biére de Noél - er enn einn belgíski jólabjórinn.  Þetta er þægilegur bjór sem pakkar alveg hæfilegu alkóhólmagni.  Ekkert of sterkur sem sagt.Í glasi er hann snotur og hnetubrúnn með hnausþykka og mjúka froðu sem minnir á nýfallinn jólasnjó! Í nefi er súrsætur gersveppur og einnig mysukeimur eða jafnvel mandarínur. Í munni er dálítið alkóhól svona í bakgrunni, gosríkur og gerjaður með sætum tón frá ristuðu malti. Smá sítrus líka.  Ágætis fylling og fínt eftirbragð. 4 krúsir
 


Winter Koninck - þessi bjór er seldur hér í DK sem eins konar jólabjór en í raun er að hægt að kaupa hann fram á sumar.   Þetta er ágætt öl en þó vantar allt púður í hann.  Þetta á að vera vetrarbjór sem þýðir að maður á að fá smá alkóhól til að ilja sér við en þessi er bara 6.5% sem er aðeins örlítið meira en hinn hefðbundni De koninck.  Mér finnst vanta pínu uppá jólafílinginn í þessum bjór hins vegar er eftirbragðið í þessum svakalega ljúft og vel þess virði að smakka.  3.5 krúsir
 


Young's Christmas Pudding Ale - er enskt jólaöl frá Young's.  Þetta er afar sérstakur bjór með mikla fyllingu og mjúkur við tönn.  Áberandi kókoskeimur í bland við þurrkaða ávexti gerir þennan bjór að algjörum sælkera.  Frábær kósíbjór.  4.5 krúsir (Bjórklúbburinn Kiddi mælir með þessum bjór!)
 


Young's Christmas Ale - er enskur bjór af gerðinni Bitter.  Þetta er fallegur bjór í glasi með ágætis froðu.  Í munni er hann þægilegur og liggur vel með fína fyllingu.  Bragðgóður er hann með eindæmum með miklum spriklandi humlum og þægilegan biturleika. .  4.0 krúsir
 


Ølfabrikken Sort Jul Í glasi er um svartan fellgan bjór að ræða með þykka fína froðu. Í nefi er hann sætur, með mikinn keim af anis og mandarínum ásamt kandís. Í munni gríðarlega mikill í munni með heilmikið bragð. Vel kolsýrður, ger,þurrkaðir ávextir, anis, appelsínur, ristað malt og brenndur sykur sem kemur inn með fyllingu og ljúfan mótleik við humla sem nánast finnast ekki. Þrælfínn jólabjór sem hefur það sem til þarf. 4.5 krúsir
 


Ølfabrikken Hvid Jul frá Ølfabrikken er alveg hreint hræðilegur bjór. Skil í raun ekki hvernig menn geta látið svona frá sér fara.  En jú líklega er það hveitiklúður sem er að gera þetta svona.  Hveiti og vetur og jól passar ekki saman.  Það er einhver vondur undarlegur keimur í þessum karli sem líklega má rekja til mislukkaðrar blöndu kóríander og kamillu. Ræð mönnum frá því að smakka þennan bjór. 1 krúsir
 


Ølfabrikken Kloster Jul frá Ølfabrikken er ansi vinsæll hér í Danmörku og virðist raka til sín verðlaunum þegar jólabjórar eru bornir saman.  Hér er um hörkutól að ræða með svakalega sterkum karakter, svo sterkum reyndar að bjórinn verður of yfirþyrmandi þegar líður á hann.  Annars bjór fullur af frútti og þurkuðum ávöxtum, kaffi og súkkulaði og jafnvel brenndum sykri. 2 krúsir
 


Jólabjórar gera líka verið í formi lagers eins og t.d. Tuborg Julebryg, Carl's Jul ofl.  Jólalager er góður jólabjór en þó auðvitað af allt öðrum toga en ölið.  Það fer í raun bara eftir stemningunni hverju sinni hvort maður vill fá þungt jólaöl eða léttan ferskan jólalager.  Danir brugga mikið af góðum jólalager og ætla ég að nefna nokkra hér.  Það ber að hafa í huga að einkunn hér miðast bara við lager en ekki öl.  Allir þekkja Tuborg Julebryg því það er einn af örfáum jólabjór sem fæst á Íslandi í kringum hátíðarnar.  Ég hef aldrei verið mikið fyrir tuborginn en þessi rétt sleppur.  Þetta er án efa besti Tubbinn þó svo að hann sé langt frá því að vera snilld.  Þetta er ferskur og frískandi bjór með ögn karamellu ef maður er voðalega næmur.  Úr flösku er bjórinn slakur, maður verður að drekka þennan af krana - 3 krúsir.  Mun betri bjór er hins vegar Carl's Jul en þar er á ferð með betri lager sem ég hef smakkað.  Því miður fæst þessi bjór ekki á Íslandi sem er ekkert nema grátlegt því þetta er bragðmikill bjór með sætu malti en þó mjög ferskum og sprækum humlum og svo má greina kanel og karamellu.  Af krana er þessi bjór hreinlega ómótstæðilegur.  Hentar vel með Dönskum eplaskífum - 5 krúsir. Frá Ceres koma tveir jólakallar, annars vegar Royal X-mas (blå) sem er afar velheppnaður jólabjór með miklu bragði og frábæru eftirbragði og fylling með ágætum - 4 krúsir.  Vilji maður hins vegar mjög sætan jólabjór þá kaupir maður Royal X-mas (hvid) sem er einnig bragðmikill bjór og nær sætum áhrifum án þess að vera væminn.  Þetta er svona alvöru sælkeri sem maður drekkur bara á jólunum þegar allt er leyfilegt - 3.5 krúsir.  Í lokin má nefna Albani Jule bryg (bláljós) sem er sterkasti jólalagerinn í þessari upptalningu.  Það eru miklir rammir humlar í þessum kalli og alkóhólið er greinilegt.  Aðeins og rammur fyrir minn smekk en er þó góður til að koma hita í kalda kroppa - 2.5 krúsir, frá Albani kemur annar jólalager (rauðhetta) sem er mun alkóhólminni.  Til eru mun fleirri danskir jólalegerar en þá hef ég ekki tekið með hér og menn verða því bara að prófa sig áfram sjálfir. 


Heima á Íslandi er einnig hægt að fá eitthvað af jólabjór þó svo að úrvalið sé sorglega lélegt.  Oftast er um að ræða bjór af gerðinni lager sem gerður er ögn dekkri og bragðmeiri en hefðbundinn lager af pilsner gerð. Sem sagt það er voðalega lítið "jóla" í þeim. Það má ekki skilja mig þannig að um vondan bjór sé að ræða, alls ekki, þetta eru oftast hressandi og fínir lagerbjórar sem passa vel við jólamat af ýmsu tagi.  Af þessum toga er t.d. Jólabjór Vikings sem er einn af þremur íslenskum jólabjórum á markaðinum, þetta er fínn lager í jólabúning, ferskur, létt humlaður og bragðgóður og gef ég honum 3.5 krúsir.  Frá Ölgerðinni koma oftast tveir jólabjórar. Annar er mjög hefðbundinn lager, Egils Jólabjór og er bara fínn en hinn sem nefnist Egils Malt Jólabjór er afar sætur og mjúkur bjór með fínan skammt af gosi.  Svipar í raun mjög til Egils Malts sem við þekkjum svo vel með Egils Appelsíni.  Fín tilbreyting frá öðrum jólabjór, svo er hægt að blanda honum við Appelsín með góðum árangri - 4 krúsir. 
Svo er það Ölvisholt brugghús, þeir komu með sinn fyrsta jólabjór 2008 og verður það að teljast afar líklegt að þeir endurtaki leikin að þessu sinni líka.  Þar sem þeir breyta uppskriftinni að hverju sinni þá get ég ekki tjáð mig um þann bjór en talsverðar líkur eru á að það verði góð og vönduð vara. Jóla Kaldi er einnig væntanlegur en hann ku hafa komið mjög vel út í fyrra. Að lokum má nefna Jólabjórinn frá Miði ehf sem útlit er fyrir að komi á markað fyrir jólin.

Erlendir jólabjórar sem við höfum aðgang að á Íslandi eru t.d. Tuborg Julebryg og svo hefur stundum verið hægt að fá Royal X-mas sem reyndar er mjög vel lukkaður danskur jólalager. Stundum höfum við verið svo heppin að boðið hefur verið upp á Delirium Christmas frá Belgíu- 3.5 krúsir, og Föroya Jóla bryggj sem er afar vel heppnað og bragðmikið jólabrugg frá frændum okkar Færeyingum - 4 krúsir.  Svo veit maður aldrei, Winter Koninck (3.5 krúsir) var einu sinni fáanlegur og það er aldrei að vita hvað gerist núna.  Samuel Adams Winter Lager hefur verið fáanlegur að undanförnu en þar er góð tilbreyting frá hinum venjulega jólalager á ferð.  Já það er ekki auðvelt að segja til um úrvalið fyrirfram en þar sem nokkur örbrugghús hafa verið að skjóta upp kollinum að undanförnu má vel búast við einhverjum jólakræsingur frá þeim.  Það er bara um að gera að fylgjast með, hér eða á síðu ÁTVR.
 

 

 

 

Cuvée De Noel eins og engill í glasi
 -upp aftur-


Nú fer að líða að jólum enn einu sinni sem þýðir að jólabjórar ef ýmsum toga fara að streyma til byggða.  Hér gætir ýmissa grasa allt frá léttum sætum lager yfir í reykta þunga státa.  Einn af þessum jólaköllum er St. Feuillien Cuvée De Noel sem ástæða er að tala um sérstaklega þar sem hér er á ferð belgískt öl af bestu gerð.  Af jólabjórum þá er þessi bestur að mati bjórbókarinnar og í raun einn af bestu bjórum veraldar og sest þar með á sömu hillu og Duvel og fleiri.  Ég hef áður metið þennan bjór og var þá fyrst fyrir vonbrigðum enda eftirvæntingin allt of mikil.  Í annað sinn, nokkru síðar, vakti þetta öl mikla lukku og ég gaf því 4 krúsir.  Sá bjór var á flösku sem er ekkert nema gott mál en það ber að athuga að þessi bjór er mun betri af krana.  Kranabjórinn er guðdómlegur, fullur af jólastöffi bæði í nefi og munni og minnir á engil í fljótandi formi.  Þegar maður hefur einu sinni fundið ilminn af Cuvée De Noel þá er bara ekki eftur snúið maður getur ekki hætt.  Krana útgáfan ef Cuvée fær 5 krúsir sem er fullt hús stiga og á hann þá einkunn fyllilega skilið.  Þetta er hreint út sagt frábær bjór en hins vegar er ekki hlaupið að því að nálgast hann af krana og því getur verið nauðsynlegt að grípa eina flösku eða tvær.  Þeir sem eru svo heppnir að vera staddir í Danmörku geta fengið þennan jólabjór á krana á Ris Ras og kostar hann 50 DKK, pínu dýrt en hverrar krónu virði.  Flöskuútgáfuna má svo finna víða t.d. á mjög góðu verði í Føtex og í Kvikly en líklega einnig í Salling, Magasin ofl.