Þetta er flaggskip Wychwood brugghússins sem glögglega má sjá á heimasíðu brugghússins! Það fyrsta sem ég vil benda á við þetta enska öl eru umbúðirnar. Flaskan er hrein snilld, glær með upphleyptum krúsídúllum þar sem brúnn mjöðurinn fær að njóta sín vel. Svo er það miðinn sem er algjört listaverk, takið eftir öllum smáatriðunum í bakgrunni. Allir bjórar frá þessu brugghúsi bera þessi listaverk (sjá nánar  http://www.wychwood.co.uk/labels_etc.htm.) En nóg um það, umbúðir eru óaðfinnanlegar en bjórinn sjálfur er líka hinn ágætasti. Fallegur í glasi, ágæt froða.  Ríkuleg lykt með ferskum humlum og áberandi brennt malt, rétt aðeins örlar á súkkulaði. Mikið og öflugt bragð, nettir humlar og töluvert malt og svo kaffi í restina. Fín fylling og langt eftirbragð. Frekar þungur bjór sem kannski ekki er allra.