Bjór frá nIcebrew hefur nú náð frá litla DK alla leið norður á Akureyri Ísland.  Já þar er nefnilega lítil bjórbumba alltaf klár í slaginn, tilbúin að smakka og kveða upp dóma sína.  Já þar býr nefnilega Óli sem er í raun sá maður sem fyllti mælinn minn hvað varðar að hefja bruggun heima við.  Óli er enn fremur sjálfur að fikta við bruggun og svo hefur hann lagt mér lið t.d. við bruggun Three Headed Monster Ale.  En Óli fékk sem sagt einn vel þroskaðan Icelandic Poverty Aid og líkaði svona líka vel við.  Hér er það sem Óli segir :

Ég dreif fram einn Iceland Poverty Aid (úr batch-i 2) og opnaði hann. Ég tók strax eftir góðri og mikilli kolsýru og hellti honum í fallegt öl glas frá Nörrebro. Liturinn eins og góðan IPA sæmir (10° SRM giska ég á) og hausinn var alveg stjórnlaus, náði alveg upp á barm jafnvel þó að ég hafi hellt fremur rólega. Hausinn var hvítur og fallegur með nokkrum loftbólum. Ilmurinn var greipkenndur og vann á eftir því sem
að bjórinn hitnaði, hann var vel kaldur þegar hann fór í glasið. Fyrstu soparnir runnu afar ljúflega niður og ég varð ekki fyrir vonbrigðum. Eins og ég tók fram þá var bjórinn ansi vel kaldur fyrst og kolsýran mikil, það hafði án efa áhrif á bragðið en þegar að bjórinn náði sínu kjörhitastigi var hann alveg hrikalega góður. Skemmtilega beiskur og maltið bakkaði hann vel upp. Umbúðirnar voru stórskemmtilegar og ég var mjög ánægður með að hafa fengið 50 cl flösku því hún tæmdist ansi fljótt! Þessi bjór er staðfesting á því að það er hægt að brugga þrusugóðan bjór heima hjá sér.

Ég segi því bara takk fyrir mig og ég get varla beðið eftir að fá að
smakka Trippel-inn.

2.4.2009 - Aprílgabb - Já það tóku víst nokkrir eftir þessari frétt í gær og sérstaklega vegna þess að sama gabb var á Visir.is en fréttamaður nokkur þar hafði heyrt af aprílgabbinu á Bjórbókinni og hér á nIcebrew og vildi fá að nota gabbið á Vísi.  Það voru margir sem lásu fréttina því teljarinn okkar sýndi verulega aukningu í heimsóknum.  Þannig fóru um 1000 manns inn á síðuna.  Enn fremur var fréttin mest lesna fréttin á síðunni og mest senda féttin. Svo virðist sem einhver hafi látið glepjast því að í aðspurður segist Ari Blöndal Eggertsson, verslunarstjóri í Vínbúðinni í Kringlunni að nokkuð hafi borið á því að menn hafi verið að spyrjast fyrir um nIcebrew bjórinn.  Sjá hér!

Ég vil bara benda á að þetta var jú auðvitað aprílgabb og vona ég að menn fyrirgefi okkur þetta uppátæki, en hins vegar er hugmyndin alls ekki svo galin og hver veit hvað gerist í framtíðinni!

21.3.2009 - Páskabjórinn kominn af stað - Páskabjórinn okkar "Easter Bunny's Memorial Brew" fór í bruggun í dag og er nú kominn í gerjun.  Vonandi verður hægt að smakka á karlinum í kringum páskana en annars er ca mánuður í að hann verði tilbúinn.  Líklega verður bara um eina gerjun að ræða og svo töppun á flöskur.  Stíllinn er nokkurn veginn í átt að Maibock.  Nánar um páskabjór má lesa hér.

17.3.2009 - Monsterið tilbúið - Já það er ekki mikið hægt að segja svo sem.  Three Headed Monster Ale er nún tilbúið og smakkast dásamlega.  Vandinn er bara sá að ég hef þegar gengið hart á lagerinn þannig að það eru bara nokkrar flöskur eftir.  Ég held að bjórinn hafi verið tilbúinn fyrir amk 2 vikum síðan því hann bragðast jafn vel nú og þá.  Svona er nú það.

6.3.2009 - Monsterið smakkað - Atli kom í heimsókn til að smakka Monsterið sem nú hefur legið á flöskum í tvær vikur.  Það er óhætt að segja að við vorum mjög ánægðir og spenntir með árangurinn.  Gríðarlega þétt og ljúf froða ofan á rauðbrúnum bjórnum kom manni strax í gott skap.  Í nefi er svona líka ljúfur keimur þar sem lakkrís kemur vel fram ásamt blómugum humlum og karamellu.  Í munni er þetta þéttur mikill bjór með ljúfan feitan skrokk.  Beiskur og kitlandi, með smákökuyfirbragði sem stafar af maltinu (cara amber og red), karamellu og svo léttbeiskum lakkrískeim í restina.  Nammi namm.  Sælgæti bjóráhugamannsins er hér með komið í heiminn.  Líklega mun bjór þessi verða flaggskip nIcebrew og mun án efa verða bruggaður aftur áður en um langt líður.  Já það var mikil kátína í brugghúsinu þennan dag.

1.3.2009 - Monks Dirty Little Secret tilbúinn- Bjórinn er dökkbrúnn eða svartur með nokkuð vel skapaðan froðuhaus sem varir út bjórinn.  Í nefi er mikil sæta, mikið malt, þurrkaðir ávextir, karamella, og kaffi.  Í munni er áberandi "belgískt" bragð.  Hér er það hið belgíska ger sem skapar réttu samsetninguna en humlarnir German Northern Brewers og Hallertauer Hershbrucker gera einnig sitt. Það er þétt og ljúft bragð með nokkuð flóknu yfirbragði.  Sæt karamella, kaffikeimur og dökkt súkkulaði í bland við sæta ávexti.  Eftirbragð er gríðarlega ljúft og varir lengi.  Fylling er meðal til mikil.  Já bjór þessi er hentugur huggubjór á síðkvöldi eða með sætum eftirrétt.  Ég er bara nokkuð sáttur við útkomuna. Að lokum vil ég óska landsmönnum til lukku með afmæli bjórsins í dag.

18.2.2009 - Monsterið komið á flöskur - Hið þríhöfða skrímsli eða The Three Headed Monster Ale er nýtt tilraunaverkefni hjá nIcebrew.  Um er að ræða samvinnuverkefni þriggja snillinga úr Bjórmenningarfélaginu Kidda sem hafa skapað dálítið sérstakt, dálítið einstakt og dálítið ógnvægnlegt, nefnilega bjór og ekki bara einhvern bjór!  Bjór þessi ber nafnið The Three Headed Monster Ale og er þannig úr garði gerður að hver og einn eftirtalinna snillinganna hefur valið sitt hráefni í bjórinn og enginn veit hvað hinn “hausinn” valdi fyrr en uppskriftin var saman komin. Þ.e.a.s ég (nIcebrew) sé um humlana, Atli fagursælkeri sér um að velja gerið sem og auka bragðefni og Óli hjá The Desert Island Brewery sér um maltið.  Á þennan máta hefur Óli áhrif á alkóhólmagnið, lit, fyllingu og auðvitað hluta af bragði á meðan nIcebrew sér um biturleikann (IBU), angann og auvitað stóran hluta bragðsins og loks hefur Atli óbeint áhrif á alkóhólmagn, angann sem og bróðurpartinn af bragðinu.  Bjórinn er svo ekki bara venjulegur bjór því hann mun búa yfir heilmiklum lækningarmætti sem rekja má til lækningarplöntunnar Illicium verum eða Stjörnuaniss á okkar máli.
    Já monsterið er sem sagt komið á flöskur núna en Atli kom hingað yfir og aðstoðaið við átöppunina.  Átöppun gekk óvenju vel og má það líklega þakka styrkri hönd Atla.  En já bjórinn mældist 6.2% sem er nokkuð lægra en ætlunin var en þó í lagi.  Nú er svo bara að bíða í 4 vikur og sjá hvað gerist.

20.10.2008 - Merkimiðinn tilbúinn fyrir First Icelandic Crisis Pale Ale.  Ég fékk nágranna minn Bjarne sem er ansi lunkinn teiknari til að teikna fyrir mig sökkvandi Ísland sem tilvísun til ástandsins heima á Íslandi.  Þetta tókst bara ágætlega hjá karlinum, á myndinni má m.a. sjá eldfjall sem spúir peningaseðlum upp í loftið og svo má sjá íslenskar krónur sökkva í sæ.