Já svei mér þá, þessir kanar eru ansi skrautlegir.  Hér rakst ég á bjór frá merkilegu brugghúsi sem kallar sig fljúgandi hundinn, Flying Dog.  Horn Dog er enskur barley wine og spennandi að sjá hvað þeir gera við slíkan stíl kanarnir.  Þessi ákveðni bjór er látinn þroskast í nokkra mánuði í tréfati áður en hann er tappaður á flöskur.  Eldist einnig vel á flösku segja þeir hjá Flying Dog.  Þetta er dökkur bjór með létta froðu.  Mikill ilmur er af honum þrunginn sætu og ávöxtum af suðrænum toga.  Kannski sætur lakkrís? Í munni er þessi bjór bara nokkuð ljúfur í fyrstu, mjúkur mjög með góða fyllingu.  Bragð býður upp á mikið og sætt malt en einnig eitthvað sætt en óvæmið sem ég kem ekki fyrir mig, gæti verið súkkulaði og apótekara lakkrís.  Vínkeimur kemur svo örlítið mikið í gegn þegar nokkrir sopar eru liðnir og skapar pínu biturleika og jafnvel dálítið of brenndan alkóhólkeim.