Það er alltaf gaman þegar nýr bjór er skapaður á klakanum.  Hins vegar virðist það loða við Íslendinga að þeir vilja alltaf halda fast í lagerinn.  Það væri gaman að fá íslenskt öl (ale) á markað til tilbreytingar.  En hvað um það, El Grillo er lageröl sem dregur nafn sitt af hinu margfræga skipsflaki  sem liggur á um 40 m dýpi á botni Seyðisfjarðar.  Þetta er gullinn og tær bjór sem unir sér vel í glasi.  Í nefi má finna ferska humla á léttu nótunum og grös. Bjórinn hefur þægilega beiskju, er ögn grösugur með fína kolsýru, og gefur ágætis fyllingu. Nettir humlar sjá svo um eftirkeiminn. Já þetta er bara hinn fínasti lager sem allt í lagi er að smakka en hins vegar er alls ekkert nýtt hér á ferð.  Þetta er í raun bara enn einn íslenski lagerinn. Hentar vel með mat af ýmsum toga.