Fjórði bjórinn frá Borg brugghús er þessi hér.  Bjartur.  Bjór þessi er líkast til bruggaður í anda belgísks blonds, hann er bjartur og fallegur.  Í nefi er hann frekar látlaus en þó má glöggt finna ávaxtakeim og belgískt geryfirbragð.  Freyðir ágætlega og heldur froðunnni.  Í munni er um heldur mildan bjór að ræða en þó alls ekki bragðlausan því það má vel finna ölkeiminn og nokkuð vel einangrað frútt.  Humlar eru í litlu hlutverki en koma þó til móts við maltið.  Bjórinn verður ögn sætur með þægilegan belgískan keim sem stafar frá gerinu.  Mjög vel lukkaður bjór og eitthvað sem menn eiga án efa eftir að kunna vel við.  Það má kannski segja að þetta sé belgískur blond sem tónaður er niður að íslenskum markaði.  Persónulega myndi ég vilja sjá mun meiri kraft í hann samt.