Hér er undarlegur drykkur á ferð sem tvinnar saman þá tvo hluti sem mér eru hvað kærastir þegar kemur að góðmeti, súkkulaði og bjór.  Bjór þessi er dálítið hulin ráðgáta, hann virðist vera bruggaður í Belgíu en erfitt er að komast að því hvaða brugghús það er sem bruggar hann.  Bjórinn er hins vegar bruggaður fyrir súkkulaðiverslun í Barcelona, Xocoa.  Þetta er annars bara hin ágætasta hressing, súkkulaðibrúnn í glasi og angar af súkkulaðikonfekti.  Í munni er um léttan sopa að ræða með lítilli fyllingu, er í raun mun þynnri  en ég hafði búist við.  Þetta er svolítið eins og kolsýrð kókómjólk á bragðið, mjög skondið.  Já ekki vondur drykkur alls ekki en samt er erfitt að kalla þetta bjór.  Bjór er þetta engu að síður, bruggaður úr malti, vatni, geri og humlum.  Mæli alls ekki með þessum drykk nema svona til að svala forvitninnim það er nefnilega alltaf gaman að smakka furðulega bjórdrykki og þessi er án efa einn slíkur.