Það eitt að horfa á barþjóninn framreiða þennan bjór kom munnvatnskirtlunum í gang í fyrsta sinn sem ég smakkaði þennan ferska ávaxtabjór í Burssel.   Í glasi sínu, sem líkist helst koníaksglasi að lögun, nýtur þessi bjór sín til fulls með sinn fallega tæra og vínrauða blæ og svo mikla ljós bleika og mjúka froðu efst.  Ummmm!  Belle-Vue Kriek er einn af þessum alvöru Kriek bjórum sem bygðir eru á hinum forna villibjór, Lambic.  Þetta er freyðandi og mildur bjór með möndlukeim og miklum kirsuberja blæ sem skapar einstakan ferskleika.  Berin gera bjórinn óneitanlega sætan en hann nær þó ekki að verða væminn þar sem hann er ögn þurr á tungu og svo finnur maður hinn einkennandi súra lambic mysukeim í gegn.  Bjór þessi er afar hentugur sem fordrykkur í veislum af öllum toga og sér í lagi í grillveislum sumarsins!